Os Antigos Paços do Concelho albergan de forma permanente unha selección de obras premiadas das XIV edicións. A exposición pode visitarse os martes, xoves e sábados, de 10:00 a 18:00 h (hora portuguesa)
O municipio de Viana do Castelo inaugurou nos Antigos Paços do Concelho unha exposición permanente que reúne obras premiadas das distintas edicións da Bienal de Pintura do Eixo Atlántico, unha iniciativa que, con case 30 anos de traxectoria, se consolidou como un dos programas culturais de maior relevancia, participación e proxección da Eurorrexión Galicia-Norte de Portugal. 
A Bienal de Pintura do Eixo Atlántico, actualmente na súa XV edición, naceu en 1997 con carácter itinerante, percorrendo municipios de Galicia e do Norte de Portugal e consolidándose como un espazo de creación e intercambio cultural.
A nova exposición dos Antigos Paços do Concelho de Viana do Castelo reúne agora, de forma permanente, 31 obras premiadas ao longo das diferentes edicións da Bienal, ofrecendo un percorrido pola evolución da pintura contemporánea da Eurorrexión e polas súas diferentes técnicas, estilos e temáticas.
Esta exposición reflicte a diversidade e vitalidade da creación artística de Galicia e do Norte de Portugal e converte Viana do Castelo nun novo espazo de referencia para a difusión deste patrimonio cultural compartido.
A Bienal de Pintura mantén, ademais, o seu compromiso coas novas xeracións a través do Premio Xóvenes Talentos Luso-Galaicos, que recoñece e dá visibilidade a novos artistas da Eurorrexión.
Con esta exposición permanente, as 31 obras gañadoras pasan a formar parte dun legado artístico accesible ao público, preservando a memoria da Bienal e mantendo vivo o diálogo cultural entre Galicia e o Norte de Portugal.
