A Bienal de Pintura do Eixo Atlántico chega a Vigo este venres

Estará ata o 14 de outubro no Museo do Mar de Galicia. A mostra percorrerá tamén Monforte de Lemos, Lugo, Lalín e Barcelos ata febreiro de 2019.

 O Museo do Mar de Galicia, situado en Vigo acolle este venres a XII Bienal de Pintura do Eixo Atlántico, con 28 obras de artistas de Galicia e o norte de Portugal.

A exposición itinerante abrirá as súas portas ás 20.00 h e permanecerá neste espazo expositivo ata o 14 de outubro.

A Bienal de Pintura do Eixo Atlántico naceu en 1997, contando con 12 edicións de itinerancia. Con máis de dúas décadas, este programa estimula a creación artística, e posibilita o intercambio cultural e o coñecemento de artistas que no Noroeste Peninsular constitúen unha contribución viva e dinámica no panorama cultural europeo.

 Neste contexto, o Premio Novos Talentos Luso-Galaicos xurdiu para estimular o esforzo e a creatividade dos máis novos, suscitando un futuro culturalmente rico e diversificado.

 A XII Bienal de Pintura percorre, entre novembro de 2017 e febreiro de 2019, varias cidades membros do Eixo Atlántico: O Barco de Valdeorras, Viana do Castelo, Porto, Braga, Peso da Régua, Riveira, Ourense, Maia, Santa Maria da Feira, Vigo, Monforte de Lemos, Lugo, Lalín e Barcelos.

Nesta edición, na que participaron máis de máis de 120 artistas, os premios do xurado presidido pola artista portuguesa Paula Tavares, recaeron en:

-Premio Novos Talentos Luso-galaicos: Fragmentos de Memória, de Fábio Araújo

-Segundo Premio de autor galego: América, de Xosé Lois Carreira López

-Segundo Premio de autor portugués: Two Big Women, de Marco Macedo

-Primeiro Premio á mellor obra do certame: Série 0, Descontruindo, de Fátima Teles.

Máis información e catálogo

OBRAS PREMIADAS