Nos Transportes Urbanos de Braga a redución de tarifas cífrase no 16% e entrará en vigor o 1 de abril próximo
Coa mobilidade descentralizada e a redución tarifaria preténdese impulsar o uso do transporte público nun país onde 60 por cento das viaxes son realizados en transporte individual. O Goberno estima captar 100.000 pasaxeiros máis, realizar 63 millóns máis de viaxes e evitar a emisión de 79 mil toneladas/ano de CO2 co programa de apoio á redución das tarifas (PART) no transporte público que vai ser implementado en todo o país, sinalou, en Braga, o secretario de Estado Adxunto e da Mobilidade de Portugal, José Gomes Mendes.
O gobernante falaba na 3.ª conferencia anual das autoridades de transportes, promovida polo Instituto da Mobilidade e dos Transportes, que se celebrou na Universidade do Minho baixo o título de “desafíos da descentralización da mobilidade”.
José Mendes destacou que o PART cobre todo o país, pero matizou que a redución dos tarifarios varía, en función do apoio das autoridades de transportes locais ou intermunicipais.
No caso de Braga, onde o Municipio é a autoridade de transportes e xestiona os Transportes Urbanos de Braga a redución de tarifas cífrase no 16%, redución que entrará en vigor o próximo 1 de abril.
O secretario de Estado da tutela explicou que foi dada autonomía ás autoridades de transportes - 23 en total no país - para implementar medidas de redución, tendo en conta que “as realidades do país son moi diferentes”.
O Goberno reservou no Orzamento de Estado para 2019, 104 millóns de euros para o PART, a que se suman 12 millóns máis de euros achegados polos concellos.
Os desafíos da descentralización da mobilidade foron onte abordados polo presidente da Comunidade Intermunicipal (CIM) do Alto Minho, José Maria Costa, e por un representante da CIM do Cávado, na conferencia que onte transcorreu en Braga.
Até o 3 de decembro deste ano, as redes de transporte público teñen que estar adxudicadas en todo o país como impón a regulamentación europea.